فعاليات المؤامرة الدولية

من يوميات علاء سيف في موتمر فينيسيا: نقلا عن مدونة منال وعلاء

1

أول حاجة اكتشفت أني انبعت، الاجتماع في ضاحية قريبة من فينيسيا يعني مش هشوف المياة ولا هركب الأتوبيس النهري، و بما أن كثير من راديكاليي اليومين دول بيعتبروا السياحة شر مش هقدر أعبر عن خيبة أملي. الاجتماع هيتم في مركز اجتماعي مستقل، واضح أن فيه مراكز عديدة من دي في أيطاليا (خصوصا في الشمال)، بعد طرد و اخلاء الكثير من ال(squats) ابتدوا يكرروا التجربة لكن على أراضي مملوكة بشكل قانوني (أكيد الصراع على مدى ثورية النقلة دي كان ضاري). المراكز الاجتماعية مستقلة تماما، ملهاش تسجيل أو صفة قانونية و ممولة ذاتيا بتبرعات (مفيش تمويل) و شوية أنشطة رابحة (مكتبة و بار و مطعم). و طبعا العاملين كلهم متطوعين. لسه مفهمتش قوي أنشطة المركز لكن واضح أن دي بتختلف من مكان لمكان. النهاردة أول يوم في الاجتماع و الناس بدأت توصل، الكوفيات الفلسطيني موجودة بكثافة شديدة لكن طبعا ملابس و علامات حركة الزاباتيستا الجدد و EZLN أكثر انتشارا، الانتفاضة الفلسطينية فقدت صورتها الثورية الرومانسية خلاص. المباني مزينة بالجرافيتي و المكان مرقع بوسترات و لافتات، مش فاهم منها غير البوسترات اللي عن ثورة الانترنت اللاسلكي و البرمجيات الحرة و مناهضة الملكية الفكرية. الأممية السادسة رقمية يا جدعان. و طبعا في كل حتى Ya Basta! و دي معناها كفاية للي ميعرفش المكتبة بيتباع فيها منتجات الزاباتيستا و الفلوس بتروح لهم في المكسيك لتمويل حركتهم و مساعدة مجتمعات السكان الأصليين اللي هما بيشتغلوا معاها، المنتجات فيها قهوة مزروعة بطرق عضوية خالصة، ملابس مقاتلي الزاباتيستا، مشغولات يدوية، أفلام تسجيلية عن الحركة الخ. غير منتجات زاباتا بيبيعوا كتب و سيديهات، أشي ماركسية و عولمة و حقوق انسان و حركات ثورية و طبعا حضور قوي للكوميكس، كوميكات تحت الأرض (بترجموا underground في السياقات الثقافية ازاي؟) و حتى حاجات ألان مور (على أساس أن V ثوري فوضووي يعني). بكره هتكون جلستي و على المنصة معايا هيكون اثنين اسرائيليين معاديين للصهيونية، المنظمين عملوا معايا اجتماع مخصوص امبارح عشان يؤكدولي معلومة أنهم معاديين للصهيونية و من الناس الحلويين مش الناس الوحشين :-) قابلت منهم اسحاق لاور، شاعر و كاتب من ضمن القلائل اللي رفضوا يخدموا في الجيش الاسرائيلي في السبعينات (قبل ما تبقى موضة) و اتحبس بسبب موقفه ده. اتكلمنا شوية عن اليسار المعتدل في أوروبا و دعمه للكيان الصهيوني. بصراحة رغم أن الراجل أيديولوجيا معانا و واخد موقف شجاع لكن لقيت صعوبة في التعامل. افتكرت ران صديقي الاسرائيلي المقيم بجنوب أفريقيا، ران برضه من ضمن الناس اللي اتحبست في لرفضه الخدمة العسكرية و هاجر بعدها على جنوب أفريقيا. ملقيتش مشكلة في التعام مع ران أبدا بس ده يمكن لأن زوجته صديقة عزيزة مثلا؟ طبعا بما أننا ثوريين و بتاع فلازم منلتزمش بالمواعيد، أول جلسة كان مفروض تبدأ من ساعة الا ربع.

2

تصحيح: كل الأماكن الشبيهة اسمها مركز اجتماعي بغض النظر عن اطار الملكية، و البتاع اللي أنا فيه ده متاخد وضع يد فعلا مش مملوك قانونا. تخيلوا في اجتماع دولي بالشكل ده الناشط الوحيد اللي مقدرش يشارك بسبب تعنت حكومته ناشط أمريكي!! عضو سابق في الفهود السوداء و قبل سفره بيومين حكومة الولايات المتحدة قررت تعيد فتح واحدة من قضايا الفهود السوداء و منعته من السفر. الجلسة الأولى مخصصة للكلمات الافتتاحية. فيه شبه اتفاق أن حركة مناهضة العولمة بصورتها ما بين أحداث تشياباس 1994 و جنوة 2001 مرورا بسياتل 1999 انتهت و أن الحركة بصورتها الحالية في أزمة و محتاجة تعيد بناء نفسها بصورة مختلفة (البعض رأيه أن ده بدأ فعلا و أننا ابتدينا نشوف صور جديدة من العمل و التنظيم). مسلي جدا أنك تشوف الناس دي كلها بتتكلم على أن أهم خطوة الحركة العالمية وصلتها هي أنها عدت خلاص الصور التقليدية للديمقراطية و تخلت تماما عن المؤسسات اللي من نوع البرلمان و القضاء على أساس أن دي مؤسسات مفقود الأمل منها. في نفس الوقت تبص في بلادنا تلاقي ثلاث أرباع الصراع مبني على محاولة لانقاذ أو اعادة بناء المؤسسات دي. المتحدثين من أجيال قديمة و بالتالي ثيمة اعادة تعريف الطبقة العاملة أو على الأقل التجمعات اللي أحنا معنيين بيها بحيث تكون واسعة و شاملة أكثر متكررة كثير، فهل نشمل كل من يعمل أيا كان العمل؟ ايه موقف العامل في عمل ذهني بحت الخ. ثيمة ثانية متكررة هي أننا داخلين على مرحلة بدل الهيمنة المطلقة للولايات المتحدة هيبقى فيه هيمنة مشتركة تدخل فيها كل الحكومات الكبرى. و أن ده حصل كرد فعل للصراع ضد الهيمنة على أمل أن يخف حدة الصراع، و فيه خلاف بقى ده تطور ايجابي و يدينا فرصة أكبر ولا سلبي و يصعب المهمة. أنطونيو نيجري شيوعية اليوم مش مفروض تكون معنية بالسلطة، هدف الحركة هو بناء مؤسسات مستقلة تماما تدير الحياة، الكلام مش عن فوضوية، أحنا شايفين ضرورة لتنظيم المجتمع و تنظيم عن طريق مؤسسات، لكن المؤسسات دي لازم تكون غير سلطوية و مركزة على العاملين في المنطقة الجغرافية المحيطة بيهم، أنا مقصدش سوفيتات السوفيتات كانت مفتوحة لعمال من نوع محدد جدا و مرتبطة بمؤسسات أخرى، أنا بتكلم عن ادراج كل صور العمل (بما فيها ستات البيوت و الطلبة أي عمل). حد ثاني لو الجيوش اتحولت لبوليس البوليس بيتحول لجيش داخلي، الحرب تعريفها مش صراع ما بين قوتين عسكريتين الحرب هي الحكم بالعنف و الارهاب و بالتالي تعريف السلام لازم يتغير ليشمل كل أشكال مقاومة الحكم بالقوة. الحقيقة باقي الكلام كان نظري قوي على ذوقي مناقشات عن مركزية الدخل كمفهوم سياسي و حاجات من دي. أنا طبعا فصلت و طلعت أتمشى في المطره. و كلام عجيب من نوع أن كميونة باريس بدأت باطلاق الرصاص على الساعات في الميادين. وقت الغذاء بما أن الأغلبية ناوية تتكلم عن موت البرلمان و اعادة تصنيف الدخل واضح أني مش هعرف أتكلم غير مع اسحاق، اتمقلزنا شوية على الأوروبيين و عجزهم التام عن تخيل عالم مختلف عن عالمهم "وفقا لاسحاق حركة مناهضة العولمة مهياش تحالف واسع، أن تتضامن مع نفسك حاجة سهلة و متستاهلش أصلا الكلام عنها، أن تتضامن آخرين هو الاختبار الحقيقي لقوتك كحركة". بعدها حكالي عن ابنه اللي عنده 12 سنة و ازاي كان بيحب بيريز لحد ما شاف مشاهد اطلاق النار على شاطئ غزة و ازاي لقاه ماشي في مظاهرة ضد الحرب الأخيرة في لبنان بيهتف بسقوط الصهيونية. بعدها دخلنا في نقاش على ضرورة تسمية موقف معاداة الصهيونية و هل مقبول أن الواحد يبقى عمليا بيشتغل ضد الكيان الصهيوني لكن ما بيعلنش رفضه المباشر للأيديولوجية و لا لأ (أنا طبعا رأيي أن ضروري تعلن بصراحة عدائك للفكرة و هو شايف أن ده مش عملي لأنه هيتصنف في اسرائيل على أنه متطرف و محدش هيسمعله). تفاديا للخلاف نقلنا للكلام عن الكورة، الكورة في ايطاليا مربوطة ارتباط عجيب بالسياسة.

3

جلسة أمريكا اللاتينية مملة شوية، رغم أن المتحدثين ناس شغالة في حركات مهمة و ليها شغل حقيقي و أكيد عندهم خبرات مهمة، و مع ذلك أغلب كلامهم ممكن ألاقيه على النت أو مليان شعارات و خلاص. طبعا ممكن يكون انطباعي ده متأثر بالترجمة الفورية، الأداء لما كان الكلام بالطلياني كان أحسن بكثير. على العموم أغلب الحضور مبسوط. عموما أهم نقطة انطرحت هي علاقة الحركة بالمؤسسة الديمقراطية النيابية و تقييم أداء حكومات اليسار الجديد المختلفة. دي من المناقشات الأزلية طبعا اللي الواحد بيفوت فيها في أي تجمع يساريين، حكومة لولا حكومة تقدمية ولا حكومة ليبرالية جديدة متخفية، حكومة شافيز سلطوية ولا ديمقراطية الخ. من منظوري المشكلة أصلا في كيفية التقييم، و الدايلما الأزلية بتاعت اصلاح ولا ثورة. هاه لو حد مهتم برأيي الشخصي، أنا شايف أن تقييم ثوري ولا لأ مش مفروض يكون على النتائج ولا حتى على الأهداف، المفروض يكون على أساليب العمل، و عموما بحصر تقييمي للمقارنة بالوضع قبل التجربة مش بالأهداف، هل الوضع بعد حكومة لولا أفضل ولا أسوأ ولا مش فارقة كثير؟ طبعا سهل على أقول كده، متفهم تماما أن اللي اشتغلوا سنين عشان الناس دي توصل للحكم ميكتفوش بالاجابة دي. بيقولوا أن الليبرالي هو محافظ دخل السجن، و بيقولك أن المعتدل هو راديكالي وصل للحكم. واحدة من المواضيع المتكررة برضه هي الاحتياج لآليات اعلامية ضخمة، افتكرت نصيحة ريتشارد ستالمان لشافيز أنه يقلد الجزيرة. بدأت أشكل في دماغي هقول ايه بكره. حجم اليسار في أمريكا اللاتينية مرعب.

4

امبارح ختم بجلسة عن آسيا، كلمة رانابير سامدار كانت كويسة جدا، فكك فيها تماما التصور الحالي عن نجاح مشروع الهند التنموى عن طريق مقارنته ببداياته و مش بالوضع بعد انتهاء الاحتلال مباشرة. صعب ألخص كلامه لأنه كان مليان تفاصيل و معلومات عن صناعات محددة في ولايات محددة و تحليله كان مبني أساسا على التعامل مع كل ولاية هندية على أنها وحدة لوحدها. حهاول ألقطه بكره و اسأله عن كتب أو مواقع عن الموضوع. يمكن أهم تنظيره طرحها البروفيسور كانت تنظيرة مرتبطة بسلطة القانون، بدأ الأول في شرح ازاي أن الديمقراطية متطلب أساسي لتحقيق مناخ يسمح بظهور أي جماعات منظمة تنظيم مستقل، و الديمقراطية بالأساس هي عملية طرح مطالب، لكن أغلب الدول منظمة بطريقة تفترض أن فيه أساليب لطرح المطالب دي مقبولة و الأساليب دي فئة محدودة و معدودة (بمعنى أن أغلب حكومات العالم مشابهة للحكومة المصرية اللي بتقول أنها معندهاش مشكلة مع التظاهر لكن أحنا اللي مش حضاريين و بنتظاهر غلط).رانابير رأيه أن تصور أن فيه أساليب مقبولة للاعتراض و طرح المطالب و الضغط فكرة منافية تماما للديمقراطية. و مثاله كان عن تجمع فلاحين في قرية قرب كالكاتا صعد في مظاهراته لدرجة أنه قفل القرية تماما و منع دخول أي ممثل للحكومة (من أي نوع) أو للأحزاب (من أي حزب مشارك في الحكم) و ازاي الحكومة الهندية اعتبرت ده خروج عن قواعد الديمقراطية السليمة و أخدت رد فعل عنيف. بيوصل بالمسألة لمداها بأنه بينقض أصلا القانون كمرجعية، في كلمته دعا لأن نتعامل مع القانون على أنه مرجعية للدولة و السلطات المختلفة و ليس مرجعية للأفراد و لا للعمل السياسي. وقت العشاء قابلت يوري جوردون الاسرائيلي الثاني في القعدة، عضو فوضوويون ضد الجدار. و عرضنا فيلم "بالعين حبيبتي" عن النضال السلمي المشترك (فلسطينيين و اسرائيليين و دوليين) في قرية بالعين الفلسطينية ضد بناء جدار الفصل العنصري على أراض القرية. و أنا بتفرج على الفيلم فهمت أكثر نقطة رانيبار عن سلطة القانون و طبعا كالعادة لما بشوف حاجة عن فلسطين أول فكرة بتيجي في دماغى هي عدم جدوى نبذ العنف في الصراع ده. النهاردة بدأ اليوم بجلسة عن الولايات المتحدة. شدني جدا كلام ستانلي أرونوفيتز عن سوق العمل في الولايات المتحدة مؤخرا و طبيعة الديون المتراكمة على الطبقة المتوسطة، أول مرة أفهم أهمية نقابة United SteelWorkers (اللي عضويتها مش حكر على عمال الحديد ولا حاجة) و الدور اللي لعبوه في سياتل. للأسف مقدرتش أكمل الجلسة عشان كان عندنا اجتماع تحضيري لجلسة الشرق الأوسط، أظن السكة اللي كانت ماشية فيها الجلسة هي توضيح أولا عمق تأثير سياسات الليبرالية الجديدة السلبي على المجتمع الأمريكي بما فيها الطبقة المتوسطة و بعدين الكلام عن صعود الراديكالية مرة ثانية في أوساط الشباب مع نقد لأداء الحركات الراديكالية الحالية و عجزها عن قراءة التحول الاقتصادي اللي هو بيقول عليه و تعاملها مع المواضيع على أنها مستقلة عن بعضها أو تركيزهم على نقد الادارة الحالية كأن الديمقراطيين هيفرقوا في حاجة. جلسة الشرق الأوسط بلا فخر أظن أنها كانت أفضل جلسة على الاطلاق، اتفقنا بدل ما نحكي للناس عن "الوضع في الشرق الأوسط" أننا نكثف كلامنا و نوجهه أكثر في اتجاه دور اليسار الراديكالي العالمي ايه. اسحاق بدأ بالكلام عن دعم الصهيونية في أوروبا و صناعة الهولوكوست، لكن التريكة بتاعته كانت أنه يتفادى تماما الكلام على اليمين في أوروبا و يركز على أخطاء اليسار في الموضوع ده. بعدها نقل لسلخ حركات السلام الاسرائيلية اللي بتستهبل و الناس اللي زي أموس عوز و طبعا توبيخ شديد للأوروبيين اللي بيسمعوا الناس دي. بعدها أنا اتكلمت، بدأت بشرح العلاقة ما بين حركة المطالبة بالديمقراطية و ما بين الصراع ضد الامبريالية (أول هتاف ضد مبارك في مظاهرات مناهضة الحرب، اشتعال الاضرابات العمالية في نفس وقت مظاهرات التضامن مع الانتفاضة الخ). بعدين اتكلمت عن ازاي لو الحركة العالمية ناوية تتعامل بجدية مع المنطقة لازم يستعدوا للتضامن و العمل مش مع اليسار اللي هو في النهاية صورة من نفسهم لكن مع الاسلاميين بصفتهم القوى الشعبية الحقيقية في المنطقة. بعدها وضحت أن من منظور الاسلاميين الصراع ضد الامبريالية مهواش بالضرورة صراع ضد الرأسمالية و ازاي أن حكوماتنا لا يمكن وصفها بالليبرالية الجديدة رغم انصياعها لشروط الليبرالية الجديدة و أديت مثال ببيع القطاع العام و ازاي أن اللي بيحصل اليومين دول مهواش البيع بالطريقة اللي بنشوفها في أمريكا اللاتينية مثلا لكنه بيع دافعه الأساسي هو الفساد المباشر (الوزير هيضرب كام في جيبه) أو محاولة سريعة للتخلص من التزامات الدولة أو من وجود تكتلات عمالية منظمة الخ، و بالتالي الخطاب المعادي أساسا للرأسمالية مش هيمشي لوحده في المنطقه. بعدها اتكلمت في مسألة تقييم الراديكالية و نسبيتها. أخر نقطة نظرية طرحتها كانت عن أهمية النضال لتحرير أو بناء مؤسسات ديمقراطية تقليدية (بما أن كل الجلسات تقريبا كانت مركزة على فشل الديمقراطية التقليدية)، منظرتش قوي في الحتة دي مجرد طرحت أمثلة عملية، حملة التضامن مع القضاء المصري كمثال لأكبر تحرك قدرت حركة الديمقراطية تحققه و أعلى تنسيق ما بين كل قوى المعارضة رغم أن الهدف هو تحرير مؤسسة المفروض أنها في التحليل اليساري التقليدي مكرسة لحماية الوضع القائم. و بعدين اتكلمت عن الاضرابات العمالية الأخيرة و ازاي ارتباطها بانتخابات النقابات العمالية هو اللي أداها الزخم الشديد ده مش في حين أن النضال على المطالب المباشرة شغال بقاله سنين بحجم أصغر بكثير و أخيرا حكيت عن اتحاد الطلاب الحر (اللي هو كيان مشابه جدا للتصورات اللي عند النشطاء الطليان عن الأطر المثلى للتنظيم) و ازاي نشأ كجزء من الصراع على تحرير اتحاد الطلاب الرسمي. و ختمت كلامي بأني أنكش شوية في حتة تقييم حكومات اليسار الجديد عن طريق افتراض ظهور حكومة يسار داخل فيها اليسار الراديكالي في مصر بعد بكره مثلا و طلبت من الجمهور يحاول يفكر في حلول سريعة لمشكلة المرور (مع توضيح ازاي حوادث الطرق و المواصلات عندنا ضحاياها أكبر من ضحايا الحروب ضد الامبريالية) و مشكلة نعمل ايه في أجهزة أمنية عضويتها تقارب على المليون كلهم مسلحين و مغرقين في تراث من القمع و الفساد و البلطجة، و أخيرا بما أن القعدة كان فيها ناس بتوع بيئة كثير ادارة نهر النيل و صعوبات تنظيم استهلاك المياه بطريقة لا مركزية. طبعا في أوروبا و أمريكا اللاتينية الأجهزة الأمنية مبتبقاش بالحجم ده و مصادر المياه متنوعة و أصلا مفيش تراث دولة متحكمة في كل شيئ تماما، كلامي كان مفهوم أكثر للناس بتوع أوروبا الشرقية و ياللا العجب الولايات المتحدة (ستانلي شايف أن سوق العمل في المنطقة عندنا مشابه أصلا للي هو بيوصفه في أمريكا). بعدي اتكلم يوري بشكل مختصر عن مصاعب و مشاكل النضال المشترك و اتكلم شوية عن مخاطر العمل مدة طويلة على قضية الأمل فيها ضعيف (تحويل النضال لطقس الغرض منه الاستعراض أو غسل الضمير و السلام) و أخيرا ختم بتوضيح قلة عدد الاسرائيليين المعادين للصهيونية. و تصوره أن ممكن ده يتحسن عن طريق تكثيف العمل مع و على أقليات اليهود في أوروبا. الجلسة استقبلت كويس و ناس كثير اهتمت تناقشني بعدها. سياحة كان فيه بعد كده جلسة عن كردستان و تركيا و كلمة لمصطفى برغوثي لكني قررت أزوغ و أتفرج على فينيسيا. أي وصف أو صور لا يمكن يحضروك لموضوع مدينة على بحيرة ده، المدينة عبارة عن مجموعة جزر صغيرة جدا مربوطة بكباري كثير، الطرق يا أما أرصفة تمشي عليها برجلك يا أما قناوات تمشي فيها مراكب، التنقل بالأوتوبيس أو التاكسي النهري (و للسياح الجند ولا طبعا). من الأخر cute city لكن مش المكان اللي تزوره و أنت لوحدك، الجو كان حلو جدا (امبارح كان مطرة بلا توقف، الربيع في أوروبا بضان)، اتمشيت أربع ساعات في البلد، اتفرجت على محلات الفنانين و الحرفيين و المكتبات و اتمنيت لو منال كانت معايا، نفسي مجابتش كنائس أو متاحف و أنا لوحدي، ركبت الأوتوبيس النهري و أخدتلي شوية صور (طبعا بدأت رحلتي في المغرب و بالتالي الصور كلها وحشة)، تهت شوية في المواصلات و بعدين رجعت على المركز. بتفرج دلوقتي على فيلم عن الحركة الطلابية في اليونان، هيييه العيال بترمي مولوتوف على البوليس.