مش لاقى عنوان

لما انفتح العالم على بعضه وظهرت ما يسمونها "ثورة الاتصالات" اصبح العالم اكثر انفتاحا و اصبح من السهل على اى انسان ان يتعرف على السمة المميزة للشعوب الاخرى.
فمثلا نجد ان السمة المميزة للشعب اليابانى انه شعب مجتهد فى عملة , كما نجد ان الشعب الفرنسى يتميز بالاناقة , و تتميز شعوب شمال اوروبا بالصرامة نتيجة الظروف المناخية التى يعيشون فيها, بل واصبحت بعض الصفات مقترنة بشعبها مثل البرود الانجليزى,والعصبية التركى......الخ.
وبعد بحث ودراسه اكتشفت ان الشعب المصرى هو كمان متميز لكن للاسف السمة المميزة ليه هو انه شعب مش لاقى !!.
بصوا انا مش هاتكلم على المشاكل الكبيرة يعنى مثلا ان المواطن المصرى مش لاقى رغيف العيش او انه مش لاقى هواء نظيف يتنفسه , او مش لاقى سبب لارتفاع سعر كل حاجة فى البلد ,ولا هاتكلم على المشاكل الصغيرة يعنى انه مش لاقى مسلسل او برنامج مختلف عن التانى او انه مش لاقى متعة فى الدورى المصرى,او حتى مش لاقى صاحب جدع.
انا بس هاتكلم عن ازاى وصلنا للحالة دى واول حاجة استنتجتها ان عشان تبقى السمة دى راسخة فى وجدان المواطن المصرى كان لابد ان تبدأ معه من الصغر يعنى من اول ما يتولد وما يلاقيش اى اهتمام طبى بيه (مش لاقى تأمين صحى كويس) مرورا بمراحل الحياة المختلفة.
و أول حاجة هابتدى بيها لما يدخل المدرسة وعلى وشه البشوش نظرة تفاؤل جميلة ويفاجأ انه مش لاقى اى مدرس يشرح بضمير او يحببه فى الدراسة لأ وكمان مش لاقى لازمة للى هو بيدرسه يقوم يكره الدراسه والعلم من و هو لسه صغير, لأ والصدمة الكبيرة لما يهرب من المدرسة هو واصحابه عشان يلعبوا كورة ويلاقى مصيبة تانية ان هو اصلا مش لاقى مكان يلعب فيه ولو الواد صبر على الدراسةوحب يمارس نشاط بطريقة شرعية بيكتشف انه مش لاقى حد يشجعة على ممارسة النشاط او الرياضة ,ويصبر ياعينى و يستحمل و يرجع غصب عنه للتعليم ويذاكر ويطلع عينه فى معركة الثانوية العامة ويجيب مجموع كبير ويفاجأ بصدمة تانية انه مش لاقى كلية حلوة يدخلها يعنى تلاقى الواحد جايب 92% ويقول خلاص انا بقيت فى هندسة يلاقى جواب التنسيق منور عليه كلمة "هندسة زراعية" ويكمل حياته فى مجال مش عايزه لمجرد (0.1)!!!!!
ولما يتخرج بيبقى مش لاقى شغل ولما يلاقى واسطة ويشتغل بيبقى مش لاقى غير البيروقراطية فى الشغل, ده غير مشكلة التأخير اليومية لأنه مش لاقى مواصلات ولو عنده عربية بيبقى مش لاقى حته يركن فيها, ولما يغلط و يفكر يتجوز بيبقى مش لاقى شقة – ولو بنت بتبقى مش لاقية عريس - ولو لقى شقة مش هيلاقى الحمى اللى يقدر ظروفـه, ولو اشتكى من حاله بيبقى مش لاقى حد يسمع الشكوى, كل ده وهو طبعا مش لاقى مسئول عن كل البلاوى دى.
وهنا يوصل لمرحلة اليأس ويحس انه مش لاقى قيمة لنفسه فى الدنيا فينتحر ويبقى مش لاقى مكان يتدفن فيه.
بصراحه انا مش لاقى كلام اقوله.
                         واقول ليه ما انا مش لاقى فايده من الكلام ..............