ترصد هذه المدونة التفاصيل الصغيرة لحياة المصريين ، وكيف يتحايلون من اجل الحفاظ على بقائهم، فى ظل الظروف الاقتصادية والاجتماعية المتردية التى يعيشونها.
موقع جديد للشبكة العربية لمعلومات حقوق الانسان
موقع جديد للشبكة العربية لمعلومات حقوق الإنسان
www.anhri.net بدلا من hrinfo.net
اضراب عام فى مصر
البداية:2008-04-06 01:01 البداية:2008-04-06 01:01 يوم 6 ابريل تدعو كافة القوى الوطنية فى مصر الى اضراب عام
فرص عمل جديدة.. زغرطى يا حكومة
دى سلسلة اعلانات جديدة عن فرص عمل ،، مش مهم فيها السن ولا المؤهل ولا الخبرة ولا الواسطة، فى الحقيقة كل يوم اشوف وظيفية جديدة، ومبقتش عارفة هى الناس بتقول انه مفيش شغل فى البلد ليه، قلت يمكن مش عارفين حاجة عن الوظايف دى وجى فى بالى اعمل الاعلانات دى على المدونة، واقول كمان ايه الحجات اللى ممكن تساعد الناس على انها تحصل عليها.
الوظيفة الاولى :
المعايير : لجميع الاعمار من (6 سنوات حتى 65 سنة)
لا يشترط المؤهل
الفرص متساوية للذكور وألاناث
وجود كوبرى مشاة (زى كوبرى غمرة مثلا )
يفضل المصابين بعجز او واحدة ست معاها طفل صغير
رأس المال المطلوب : بضاعة يسدد تمنها بألاجل
ومش هتحتاج حاجة اكتر من انك كل يوم الصبح تاخد البضاعة وتتعكز على الناس اللى معدية لحد متطلع سلم الكوبرى وتفرش البضاعة، وتستنى الناس تيجى تشترى منك .
تأبين محمد حاكم
البداية:2007-07-30 00:54 البداية:2007-07-30 00:54 يقام يوم الاثنين 30 يوليو بمقر نقابة الصحفيين تأبين الراحل "محمد حاكم" وذلك فى الساعة الثامنة مساء.
عن النهايات الغير متوقعة
عادت احاديث الموت خلال الاسابيع الاخيرة بشكل مكثف لحياتى، بعد
ان كانت قد بعدت فى ذاكرتى بعد وفاة جدتى منذ 6 اعوام والتى صدمت بسببها صدمة شديدة فلم اترك منزلها الا بعد 4 اشهر ظننا منى انى سوف ارها عندما تتجلى كروح طيبة كما كانت تحكى لى هى عن ارواح الطيبين الذين تهيم ارواحهم حيث كانوا يعيشون، وقد ظللت عاما كاملا لا امارس اية طقوس لها علاقة بالبهجة فلم امارس هوايتى الوحيدة "الرقص" وقاطعت احتفالات الاصدقاء وحفلات البهجة والغناء...الخ، ولم تبارح الملابس الداكنة جسدى بالرغم مما تعطيه من كأبة لوجهى الاسمر، وظللت عاما آخر اشعر بالخجل عندما امارس اية طقوس احتفالية ظننا منى انها سوف ترانى وهى تهيم وتحس اننى لم احزن على فراقها كما ينبغى.وما زلت اشعر بالغضاضة كلما تذكرتها او افتقدتها.واعتقدت وقتها انى لن اعرف معنى الحزن مرة اخرى.
" اجرة.... تاكسى " بس ملاكى
بقالى يجى شهرين كدة وانا ماشية فى اى شارع فى حلوان اجى اوقف تاكسى الاقى عربية ملاكى وقفت، ساعات بتكون جديدة وساعات بتكون نص عمر، قلت يمكن انا شكلى اليومين دول مش ولا بد احترم نفسى واخد بالى من هدومى شوية، بعد فترة لقيت عند محطة المترو اللى انا ساكنة عندها "طرة البلد" كمان عربيات ملاكى بتنادى على اللى عايز يركب، بعدين بقت نفس العربيات فى حلوان بقت تقف وتقول " اجرة.. تاكسى" عشان الناس طبعا كانت بتقلق تركب معاهم قلت اشوف ايه الموضوع، ركبت مع واحد قالى انه كان موظف فى بنك اسكندرية ولما اتباع طلع معاش مبكر واغلب الناس اللى معاها العربيات دى طلعت معاش مبكر وبقت تشغل العربيات بتاعتها اجرة جوة حلوان عشان يقدروا يعيشوا، اشتروا العربيات بدل مالفلوس تطير ويشحتوا ومجابوش تاكسى عشان الضرائب .
فين المناديل
زمان.. لا مش زمان قوى لما كنت بدخل حمام مكان عام من اللى بدفع فيهم فلوس كتير كان لازم يكون فى مناديل فى الحمام، فى الفترة الاخيرة مبقتش الاقى المناديل دي وافضل اشتم فى اصحاب المحلات اللى الناس بتدفع فيها كل الفلوس دى ومستخسرين بكرة مناديل فى الزباين، لحد خدت بالى قريب ان البنات اللى بيشغلوا فى الحمام بياخدوا المناديل ولما يلاقوكى محتاسة يسألوا عايزة مناديل ؟؟ وبس مش معنى انى قولت ايوة هخدها لا ده مرهون بانى ادفع بقشيش الاول، وياسلام لو انا مش معايا الشنطة ولا مفيش فاكة فى جيبى طبعا هخرج من الحمام "ايدى" مبلولة.
الاول كنت بتنرفز بعدين حفظت السستم اللى البنات دول عودوا الزباين عليه، حقهم امال هيعيشوا ازاى بالمية جنية اللى بيقبضوها آخر الشهر، وهمة شايفين اقل فاتورة بتدفع اد مرتبهم مرتين، واللى مش عاجبها تبقى تجيب مناديلها معاها.
محمود... عايز يعيش
محمود... شاب عنده 24 سنة ومتجوز بيشتغل فى كافى شوب بيرص شيشة، وطبعا مرتبه مش مقضيه، عارفين بيعمل ايه لو الزبون طلب 5 حجارة يحسبلوا 3 حجرة بس على المحل ويحطلوا اتنين من عنده وياخد هو حقهم(محمود شارى باكو معسل غير بتوع الكافية عشان ميبقاش بيسرق منهم حاجة) هيعمل ايه مهو لازم يعيش، الله يعينه، هو كمان ولد لطيف جدا وبيعامل الزباين كويس قوى وكلهم بيحبوه، وبيستنوا قبل ميحاسبوا يستنوه يجى يقولهم انا منزل (3 بس على الشيك) وهمة يضحكوا بس ياترى كلهم فاهمين محمود بيعمل كدة ليه؟
أرا.. أرا..أرا .. أرا ايه ..أراجوز
الارجوز رجع تانى يا ولاد.. امبارح باليل شفت ارجوز على قهوة فى شارع قصر النيل... راجل كبير عنده تقريبا 65 سنة بيلف بصندوق ارجوز الوانه جميلة قوى، احمر واصفر وابيض، وعمل عرض حوالى 10 دقايق كان العرض حلو كل اللى على القهوة ضحكوا، بس اللى مكنش حلو ان الدنيا كانت برد وليل صعب على الراجل ده انه يلف كدة داحنا ياشباب كنا بردانين ومش منزلنا من البيت الا الشديد القوى، وبعد مخلص العرض لف بالطارعلى القاعدين عشان يحطولوا الفكة اللى فى جبهم واغلبهم جبهم كان فاضى ومدلوش حاجة، صعب عليا قوى الراجل فكر ازاى "يتحايل" على ظروفه عشان يقدر يعيش لقى انه يلف كدة وهو شايل الصندوق التقيل على ظهره فى عز البرد ويلف على قهاوى نص اللى فيها مفلسين احسن من أنه يشحت، انا عرفت انها مش شغلته عشان مكنش مركب الزمارة اللى بتعمل صوت الارجوز عشان مش اى حد بيعرف يعملها. واهو كدة المصريين بيعيشوا بيتصرفوا عشان ميموتوش من الجوع.
زحمة يا دنيا زحمة
من الصبح بفكر اكتب التدوينة دى ولا لأ حاسة انى لما اقول ان الدنيا زحمة الناس هتضحك عليا عشان الموضوع مش محتاج قوالة، بس انا النهاردة كنت على شفى الصريخ ولو كان فى مكان ينفع افتح باب التاكسى وانزل كنت فضلت اجرى واصرخ لحد مرسى مطروح على الاقل، كنت راكبة تاكسى فى حلوان فجاءة الشارع وقف والدنيا اتملت زمامير ولقيت ورايا العربية اللى بترصف الشارع (مع ان كل شوارع حلوان مكسرة) ومعرفش العربية دى ماشية الساعة واحدة الظهر ليه وكل اللى سايقين بيتصرفوا بمنتهى الغباء وفضلت الدنيا تقفل تقفل لحد لما اتهيئلى انى هفضل فى المكان ده بقيت عمرى. وبعدين فجاءة لقيت شرطى مرور وانا اول مرة اشوف شرطى فى الشارع ده وعرفت طبعا ايه اللى ممكن يوقف الشارع عشان ده المشهد الطبيعى انك اول متلاقى شارع ماشى كل يوم مقفول تعرف انك فى الاخر هتلاقى شرطى مرور "مفاجاءة كلنا عارفنها " . بس حسيت انى لو مكتبتش الموضوع ده مش هقدر انام ويارب ميحصلش كدة بكررررررررررررررررررررررة
تصبحوا على خير